Սինաբոնը յուրահատուկ, քաղցր, դարչինով թխվածքաբլիթ է : Այս քաղցրավենիքն արդեն երկար տարիներ համարվում է նույնանուն ապրանքանիշի այցեքարտը:Մեքսիկական պարբերականներից մեկը`«Expansion Magazine»-ը սինաբոնը ներառել է կյանքի 50հաճույքների ցուցակում:

Սինաբոնը կարելի է պատրաստել տան պայմաններում նույնպես:

Դրա համար անհրաժեշտ են․

Խմոր

• 250 մլ գոլ կաթ
• 2 ձու` սենյակային ջերմության
• 75գր հալեցրած կարագ
• 500 գր ալյուր
• 1 թեյի գդալ աղ
• 100 գր շաքարավազ
• 7 գր չոր ակտիվ խմորիչ։

Լիցք

• 1 բաժակ շագանակագույն շաքարավազ
• 2 ½ ճաշի գդալ աղացած դարչին
• 75 գր կարագ։

Քսուք

• 100 գր սերուցքային պանիր
• 50 գր կարագ
• 200 գր շաքարավազի փոշի
• ½ թեյի գդալ վանիլային էքստրակտ
• 1/8 թեյի գդալ աղ։

Պատրաստման եղանակը․

Լցրեք խմորիչը գոլ կաթի մեջ, ավելացրեք 1 ճաշի գդալ շաքարավազ և թողեք մինչև խմորիչը փրփրի: Ձուն հարեք շաքարավազի հետ, ավելացրեք հալեցրած կարագը, աղ, խմորիչով կաթը և խառնեք: Այնուհետև կամաց-կամաց ավելացրեք ալյուրը և խառնեք խմորը 7-8 րոպե, որից հետո ծածկեք այն և թողեք տաք վայրում, որ բարձրանա:

Խմորը բարձրանալուց հետո տեղափոխեք այն թեթևակիորեն ալյուրով պատված սեղանի վրա, ծածկեք այն և թողեք 10 րոպե: Փոքր տարրայի մեջ խառնեք շագանակագույն շաքարավազը և դարչինը:

Ուղղանկյունաձև բացեք խմորը 40×50 սմ: Վրան քսեք կարագ և հավասար լցրեք շաքարավազի և դաչրինի խառնուրդը:

Երկար գլանի տեսք տվեք խմորին և բաժանեք 12 մասի: Տեղադրեք բլիթները կարագով պատված 25×35 սմ չափսի կաղապարի մեջ: Ծածկեք և թողեք բարձրանա: Դա կտևի մոտ 30 րոպե: Տաքացրեք վառարանը մինչև 200 աստիճան:

Թխեք 15 րոպե` մինչև թբլիթները դառնան ոսկեգույն-շագանակագույն:

Քսուք

Քանի դեռ թխվածքաբլիթները թխվում են, հարեք սերուցքային պանիրը, 50 գր փափկած կարագը, շաքարավազի փոշին, վանիլինը և աղը: Մատուցելուց առաջ ստացվածը քսեք թխվածքաբլիթների վրա և վայելեք:

Բարի ախորժակ: